Arddangosfa Ffotograffiaeth FdA 2020 – Coleg Llandrillo
Ar ddechrau pob blwyddyn, mae Oriel Colwyn yn cymryd y cyfle i gefnogi ac arddangos arddangosfa grŵp myfyrwyr ail flwyddyn sy’n cwblhau cwrs Ffotograffiaeth FdA Coleg Llandrillo.
Eleni rydym ni’n cyflwyno gwaith:
Sarah Williams
Dw i’n ymddiddori mewn portreadu ac mae’r gwaith dw i’n ei greu wedi’i ddylanwadu’n fawr gan iaith weledol ffilmiau arswyd a genres cysylltiedig eraill. Mae defnyddio ffurf sefydledig i gynrychioli ofn a thrawma lle mae merched yn cael eu darlunio fel dioddefwyr yn ffordd i mi herio’r sefyllfa a dderbynnir.
Dim teitl © Sarah Williams
Katie Valintine
Mae fy ngwaith yn yr arddangosfa hon yn canolbwyntio ar faterion sy’n gysylltiedig â’r diwydiant ffasiwn. Mae cyflwr y Ddaear a cheisio ei hachub yn bwysig i lawer o bobl ac mae tynnu sylw at feysydd sy’n destun pryder drwy fy ffotograffiaeth wedi bod yn rhywbeth gwerth chweil.
Dim teitl © Katie Valintine
Harley Davies
Mae’r newid graddol yn niwylliant canol trefi o gyflenwi nwyddau i adloniant wedi cael effaith fawr ar dirlun cymdeithasol Prydain. Lle’r oedd unwaith siopau ac unig fasnachwyr, mae yna rŵan glybiau, barrau a chaffis. Yn ystod y dydd mae’r trefi sydd ar drengi yn llawn pobl nad ydyn nhw’n gallu fforddio’r profiad allan o’r dref. Maen nhw’n prynu pethau o siopau bargeinion ac yn eistedd y tu allan gyda ffrindiau yn yfed coffi Costa ar ddiwrnodau oer a gwlyb. Mae’r genhedlaeth iau yn dod allan gyda’r hwyr, i boblogi’r barrau ac i fwynhau’r nos. Dyma fi, a Bae Colwyn yw fy nhref. Dw i fel arfer yn mynd i Noah’s, sydd wedi’i ailwampio’n ddiweddar, yng nghanol Bae Colwyn. Dyma’r lle dw i’n cwrdd â ffrindiau, chwarae pŵl, gwrando ar gerddoriaeth a thynnu lluniau o’r nosweithiau. Mae nos Wener yn noson dda iawn, gyda’r llawr dawnsio’n cael ei oleuo a’r parti ar ei anterth, a dw i’n mynd ar ôl tynnu’r lluniau.
Kalen Lindell
Mae’r diwydiant ceir yn obsesiwn byd-eang ac yn ystod y ddwy flynedd ddiwethaf dw i wedi bod yn dogfennu’r sîn Prydeinig, gan deithio ar hyd a lled y wlad, ddydd a nos, i fynd i gymaint o ddigwyddiadau ceir â phosibl. Mynd i feysydd parcio ar nosweithiau oer a rhewllyd i ddathlu’r addasiadau diweddaraf sy’n cael eu gwneud gan bobl sydd yr un mor frwdfrydig am geir â fi, siarad am injans, uwchraddiadau, trin a thyniant – o am fynd yn ôl i’r dyddiau cynnar hynny. Ar benwythnosau mi fyddwch chi fel arfer yn fy ngweld i mewn digwyddiadau trac, gyda’r camera yn barod, yn tynnu lluniau o’r prysurdeb tu ôl i’r llwyfan a’r cyfeillgarwch.
Denise Baker
Wedi refferendwm Brexit, mi es i arddangosiadau, nid fel arsyllwr llonydd ond fel cyfranogwr gweithgar. Fel gweithredydd dw i wedi treulio fy mywyd yn sefyll dros hawliau pobl a gwneud yn siŵr bod pobl yn clywed fy llais. Rŵan yn oes y rhyngrwyd a rhwydweithio cymdeithasol, dw i’n defnyddio fy nghamera yn ogystal â’m llais, nid i greu cynnwys golygyddol ond i ddogfennu a rhannu straeon sy’n datblygu ar y stryd. Dechreuais edrych ar y negeseuon hefyd; mae protestiadau Prydeinig yn dweud llawer am y natur Brydeinig, mae’r baneri a’r hysbyslenni yn dangos ‘cwrteisi’; arddull gynnil o hiwmor sy’n rhywbeth penodol iawn i Brydain.
Dim teitl © Denise Baker
Callum Humphreys
MONA
Ar ôl disgyn i drap tref fach o wneud dewisiadau bywyd niweidiol, penderfynais yn fy ugeiniau canol i roi’r gorau i’r arferion afiach. O ganlyniad mi oeddwn i’n llawer mwy mewndroëdig, ond bodlon, gyda ffurf newydd ar eglurder. Yn sydyn sylweddolais nad oeddwn i’n gwybod dim byd am yr ynys wledig a thawel oedd wedi fy siapio.
Nod y prosiect oedd ailgysylltu â’r fro sy’n gartref i mi, a datgodio’r amodau a arweiniodd i mi ei gadael unwaith.
Dim teitl © Callum Humphreys
Jade Vickers
Mae’r llyfr sy’n cael ei arddangos yma yn cael ei alw’n llyfr ‘dymi’ gan gyhoeddwyr. Hwn ydi’r ymgais gyntaf i osod y gwaith mewn rhyw fath o drefn. Dw i’n trio adrodd hanes fy mywyd mewn ffordd weledol gywrain. Dydi’r delweddau ddim mewn trefn gronolegol ond maen nhw wedi’u gosod ar y tudalennau mewn ffordd sy’n cyfleu fy syniad i o gof. Mae’r drefn yn cynnig posibiliadau newydd o haenau a chysylltiadau, ac mewn blynyddoedd i ddod, tybed ai’r delweddau hyn fydd yr unig dystiolaeth gadarn o’r atgofion? A fyddaf wir yn gwybod beth wnes i cyn neu ar ôl tynnu’r llun? Oni bai am y llun, a fyddaf yn cofio’r eiliad o gwbl?
Dim teitl © Jade Vickers
Abby Georgia Anton
Wedi fy magu ar arfordir gogledd Cymru, roedd chwareli llechi yn rhywbeth yr oeddwn i’n ei gysylltu â mynyddoedd Eryri ac yn rhywbeth oedd yn perthyn i hanes. Roedd yr hen chwareli llechi a’r mynyddoedd o wastraff llechi a welais ar ein teithiau yn y car yn rhan o gefndir gogledd Cymru. Ychydig iawn a wyddwn ei fod yn ddiwydiant a siapiodd y byd diwydiannol ac a effeithiodd ar ddiwylliant gogledd Cymru’n sylweddol, fel y cymoedd glo yn y de.
Dim teitl © Abby Georgia Anton
Bob Mcraight
Testun i ddilyn…
