Ffotograffiaeth FdA – Coleg Llandrillo
Unwaith eto mae Oriel Colwyn yn falch o gefnogi arddangosfa myfyrwyr cwrs Ffotograffiaeth FDA Coleg Llandrillo.
Gallwch ddarllen eu cylchgrawn ar-lein18 Percent YMA
Eleni rydym ni’n cyflwyno gwaith:
Dilys Thompson
Mae Dilys wedi meithrin diddordeb mewn ffotograffiaeth golau isel, gan weithio ym Manceinion ac ar Ynys Môn mae hi wedi creu darn o waith sy’n edrych ar y gwahaniaethau rhwng y ddau le, gan gipio goleuadau prysur y ddinas ac awyr serog lleoliadau gwledig anghysbell.
Nick Drabble
Mae Nick yn arbenigo mewn ffotograffiaeth ffasiwn a phortreadau. Gan roi sylw manwl i fanylion, dylunio, lliw a chywirdeb technegol, mae o’n cydweithio gyda steilwyr i greu delweddau sy’n canolbwyntio ar y dillad. Mae o’n arddangos rhywfaint o’i ffotograffau ffasiwn yn Oriel Colwyn, yn ogystal â chasgliad o waith arsylwadol a mwy hamddenol ar ffilm.
William Morgan
Eleni mae William wedi dangos diddordeb mawr mewn ffotograffiaeth bensaernïol. Un o’i brosiectau oedd tynnu lluniau rhai o westai gorau gogledd Cymru, gan ddefnyddio dull masnachol i greu delweddau arddull fasnachol. Mae William hefyd yn tynnu lluniau o’r bensaernïaeth sydd o’i gwmpas pan fydd o allan o gwmpas, gan gynhyrchu delweddau sy’n cyfuno strydoedd a cherflunwaith a phensaernïaeth, ac mae’r rhain hefyd i’w gweld yn yr arddangosfa hon.
Philip Jones
Mae Philip yn ffotograffydd sy’n saethu ystod eang o destunau a lleoliadau. Mae ganddo berthynas bersonol ag arfordir gogledd Cymru, ac mae hynny i’w weld yn amlwg yn ei waith. Ar gyfer yr arddangosfa hon mae gwaith Philip wedi canolbwyntio ar dirwedd wrth-gymdeithasol.
Chloe Merrison
Mae Chloe wedi meithrin a datblygu ymwybyddiaeth o ffotograffiaeth ac yn ymddiddori mewn gwaith hysbysebu a montage. Mae hi’n hoffi cyfuno amrywiaeth o genres, o ffotograffau modern i ffotograffau pwrpasol, i greu rhywbeth unigryw. Mae Chloe yn credu ei bod yn creu ei delweddau mor realistig â phosib’, gan arddangos darnau cywir a pherthynol o waith. Bydd yn arddangos rhywfaint o’i gwaith montage o’i chasgliad newydd yn Oriel Colwyn.
Stuart Philips
Mae Stuart yn ymddiddori mewn ffotograffiaeth tirlun yn bennaf, gan gyfuno hynny gyda dinoethiadau hir i ddal symudiad y delweddau mae’n eu cymryd. Mae’r delweddau y mae wedi’u dewis ar gyfer yr arddangosfa hon yn rhai o dirweddau sydd wedi’u haddasu gan law dyn.
Joan Mallen
Yn ystod y ddwy flynedd ddiwethaf ar gwrs Ffotograffiaeth FdA mae Joan wedi canolbwyntio ar ffotograffiaeth bywyd gwyllt, sydd yn bennaf wedi’u cymryd yn Sw Caer. Mae tynnu lluniau o fywyd gwyllt yn rhywbeth mae Joan yn ei fwynhau’n arw, ac yn ffordd iddi ymlacio.
Jessica Tebbitts
Yn ystod yr ychydig flynyddoedd diwethaf mae Jessica wedi meithrin diddordeb mewn tynnu lluniau o nosweithiau allan. Mae hi’n defnyddio camerâu untro, gan dynnu lluniau o bobl mewn clybiau, rêfs a gwyliau.
Derek Crawford
Daw’r delweddau sydd wedi’u creu ar gyfer yr arddangosfa hon o brosiect parhaus sy’n archwilio cydadwaith golau’r haul ar adlewyrchiad a chysgod gosodiadau a dodrefn, gyda gweadau’r waliau gwyn a’r fframiau drysau mewn lleoliad domestig.
Georgia Stafford
Mae Georgia wedi canolbwyntio ei sgiliau ffotograffiaeth ar ddogfennu datblygiad y caban pren mae hi’n byw ynddo – y datblygiadau tu mewn a datblygiadau yn y dirwedd o’i gwmpas.